Ураза
Ураза — ул калкан;
Ураза тот, начарлыктан саклан
Таң алдыннан тор син, әйдә, «аша сәхәр»
Йокласа да бу вакытта бөтен шәһәр,
Укы намаз, төнлә кылган гыйбадәттән
Кыйммәт түгел, бернинди дә энҗе-җәүһәр.
Рамазанда руза тоткан мөселманнар
Беләсеңме, җәннәткә керәчәк каян?
Алар өчен булыр анда аерым капка —
Ул капканың исемнәре булыр Раян.
Ураза — ул сәламәтлекнең ачкычы
Иманыбыз үсешенең бер баскычы.
Өйрәтә ул түземлеккә, сабырлыкка
Ә сабырлык — иманыбызның яртысы.
Ураза — ул өйрәтә шөкер итәргә
Өстәлләребездә булган мул тәгамгә,
Көне буе ашатмыйча, эчертмичә
Ачның хәлен аңлатадыр тук адәмгә
Уразаның тәнгә-рухка файдасы зур
Күрсәтә ул динебезнең зирәклеген,
Хайван сыман, ашау өчен генә түгел
Кеше булып яши белү кирәклеген.
Ихсан Нурисламов
Мөселман айлары
Мөселман айлары
Мөселманча ел хисабы
Һиҗри диеп атала.
Ә аның иң беренчесе –
Мөхәррәм ае була.
Елны дәвам итә Сәфәр,
Аннан – Рабигуль әүвәл.
Рабигуль сәни артыннан
Килә Җөмәдел әүвәл.
Җөмәдел ахир ияртә
Рәҗәп белән Шәгъбанны.
Рамазан ае – изге ай,
Һәрберсе белә аны.
Шәүвәл, Зөлкәгъдә, Зөлхиҗҗә –
Елның соңгы айлары.
Барысын исәпләп кара,
Уникедер саннары.
Зөлхиҗҗәдә – Гәрәфә көн,
Мөхәррәмдә – Гашура.
Руза тотып, гөнаһлардан
Пакьлану булып тора.
Сәфәр ае да гадәти –
Рөхсәт ителгән һәр эш.
Аллаһ айлары барысы да,
Белмәсәң сора, белеш.
Җөмәдел сүзе аңлата
Суның катуын – бозны.
Әүвәл һәм ахир сүзләре –
Кыш башы һәм азагы.
Рабигуль әүвәл – яз башы,
Сәни була азагы.
Рамазан сүзе аңлата
Кызу белән кайнарны.
Барча мөселман дөньясы
Иске елны озатты.
Һиҗрәттән саналган еллар
Мең дүрт йөз утыз алты.
